Общая молитва преподобным отцам нашим Почаевским Иову, игумену и чудотворцу, и Амфилохию, исповеднику и целителю.

Ко преподобным и богоносным отцам нашим Иову и Амфилохию помолимся.

Преподобные отцы Иов и Амфилохий Почаевские. Современная икона.

О, преподобніи и богоносніи отцы наши Почаевстии Иове и Амфилохие, блаженного смиренія и спасительного послушанія, нелицемерного братолюбія и евангельскія кротости, усердного трудолюбія, безропотного терпенія и молитвенного бденія от раннея юности до позднея старости в духовней радости неутомиміи подвижницы, благоговейніи Божественныя литургии служителіе, бесов прогонителіе и многоразличных болезней целителіе, иноков ревностнаго подвижничества и всех чтущих память вашу богомудріи наставницы, Церкве Православныя велиціи защитницы, земли Волынскія и Галицкія светила благосветліи, святыя Почаевскія обители, всех подвизающихся в ней и на поклонение в ню приходящих, всех, заповедавших нам молитися о них [аще хощеши, их имена рек], и всех православных христіан непобедиміи защитницы!

Призрите любовію вашею на нас, недостойных чад ваших, к вам усердно днесь притекающих и пред вашими духоносными и многоцелебными мощами [иконами] благоговейно с вами Богу молящіхся, и испросите предстательством вашим ко Всевышнему Владыце всем нам и всем боголюбивым людем вся, яже к животу и благочестию полезная и благопотребная: заблудшія вразумите, юныя воспитайте, болящия исцелите, малодушныя ободрите, скорбящия утешите, обидимыя заступите, немощныя подкрепите и поверженныя долу возставите; всем вся просимая, благодатию от Бога данною, даруйте, по коегождо нужде и потребе, во спасение души и во здравие телу. Утвердите Церковь Православную в земле нашей во истине и избавите люди наши от расколов, ересей и латинства. Вознесите, угодницы Божіи, всемощную молитву вашу о стране нашей, да будет в ней мир и тишина, благочестіе и благоденствіе, в судах правда и милость, в советах мудрость и благое преспеяніе, да утверждается же во благих человецех верность, в злых же страх и боязнь, во еже престати им от зла и творити добрая, да тако в сердцах человеческих Царство Христово растет и множится, и да прославится в нас Бог, дивный во святых Своих: Емуже Единому Отцу и Сыну, и Святому Духу подобает слава, честь и поклоненіе во веки веков. Аминь.